آخر المشاركات



أهلا وسهلا بك زائرنا الكريم في ديوان الشاعر نافل علي الحربي، لكي تتمكن من المشاركة ومشاهدة جميع أقسام المنتدى وكافة الميزات ، يجب عليك إنشاء حساب جديد بالتسجيل بالضغط هنا أو تسجيل الدخول اضغط هنا إذا كنت عضواً .


الملاحظات





الفصل الرابع: الغزل

الفصل الرابع: الغزل هذا الفصل الرابع، من هذا الديوان، خصصته لشعر الغزل، وشعر الغزل هو الذي يقصد به وصف الحب الغرام، وال ..




06-09-2019 09:03 مساء
نافل علي الحربي
menu_open عضوية موثقة
مدير المنتدى
rating
معلومات الكاتب ▼
تاريخ الإنضمام : 27-07-2019
رقم العضوية : 2
المشاركات : 335
الجنس : ذكر
الدعوات : 1
يتابعهم : 0
يتابعونه : 1
قوة السمعة : 10
موقعي : زيارة موقعي
 offline 


الفصل الرابع: الغزل
هذا الفصل الرابع، من هذا الديوان، خصصته لشعر الغزل، وشعر الغزل هو الذي يقصد به وصف الحب الغرام، والحرمان، ومعاناة العاغشق، وشدة ولعه في معشوقته، ووجده إليها، فيصف حاله مع هواها، ويستدر عطفها، ويبثها ما يعاني بسبب تعلقه بها، ويصف محاسنها، وجمالها، والحبُ وإن كان موجوداً في كل زمانٍ ومكان، أجمله ما كان في الزمن الماضي، عند ما كانت تحكم الناسَ الأعرافُ، والعادات الحميدة، وكان الشرف، والصدق عماد هذه الأعرافِ، والعادات المتعارف عليها، وأجزل شعر الغزل ما كان عفيفاً، خالاً من الهزل، والميوعة، والسفسفة بالألفاظ، التي توحي بالاضلال، والخروج على الآداب، والحشمة، والقيم الإنسانية النبيلة، بل إلى العفة، والشفافية البرئية 0 

 ما احتملته 
قصيدة تخاطب مرسولاً في طلب يد معشوقة: 
مشكور يالمرسول لو كان ما أشفيت = ولو كان ماودي بعلمٍ حملته
رديت علمٍ ما هو اللي تحريت = ولا ادري وش أقول لك على ما بذلته
من حال ما كنّك ولا شيء سويت = ومن حال كنّك كل شيءٍ فعلته





ما ادري أقول انك لواجبك أديت = واحسنت معه بقولك اللي أنت قلته
وإلا أقول انك علينا تجنيت= من سؤ فهمك لعلمنا اللي نقلته
تبيني أصدق بعلمك وأنا أزريت =ولو تثبت اللي قلت لي ما احتملته
لا جيت أبى أسلا وأتناساه رديت = حيثه يغير كل شيءٍ أملته
ما ادري أصدق وأقدر أنساه لا ابطيت= ولا شفت ما يثّر زعل بي شلته
واطلب من الله يخلف اللي ترجيت = ويعوضني عن كل فعلٍ عملته
وإلا أن لقيت موصل العلم وصيت = يرد لي هو صدق وإلا امتحلته
إن كان علمك كذب طبت وتـهنيت = وعدت الأمل في صاحبي واستملته
إن كان معي ويقبل اللي تـمنيت =جميع ما يطلب لعينه قبلته
وإن كان ضدي يرفض اللي توريت =لو هو بمخي يمكن أني نخلته



  سلم البداوه  
يا صاحبي إلى متى ما تجيني = إلى متى نبقا بـهجر وشقاوه
حتى الحديد إن طال وقته يليني = وقلبك علي يزيد متن وقساوه
من يوم ما شافتك بالحي عيني = والحي عقبك ما بشوفه طراوه
أرجوك إذا يسهل عليك أخبريني = عني أبعدتك ظروف وإلا عداوه
البعد ما هو عذر بينك وبيني = أصلك لو إنك وراء بحر جاوه -1
إلا كان إنك مبعدٍ ما تبيني = أنا ترا مانيب خبلٍ لعاوه-2
بس بالإشاره أوعزي وأبلغيني = وانفذ أمرك بإمتثال وضراوه-3
وأهجرك ما أزورك ولا أنتي تجيني = إلا إذا الطايف يزور السماوه-4
ومن عادتي انجز اموري بحيني = لا قاصر الهمه ولابي غباوه
متثقفٍ بدنياي وعلوم ديني = وأنا على طبعي وسلم البداوه-5

الحاشية:
 - 1- جاوة: جزيرة أندوننيسية0 2- لعاوة:سيء خلق، متشبث حريص0 3- ضراوة: قوة0 4- سخاوة: سموحة0 5- سلم: عادة0  




 يدك والحار 
ياللي تخفي كيةٍ شكلها حي = لا تعتبرها عيب من ضمن الأسرار
النار يثّر لمسها بالجسد كي = والعار يثّر في جسد فاعله نار
والكي ما به في سلوم العرب شيء = الشيء بسلوم العرب وصمة العار
يوصم بها اللي سالكٍ مسلكٍ سي = صن الشرف يا ابن الشرف يدك والحار
إن كان في قولي خطأ قلته ولي = ما عاد يمديني عقب قوله إنكار
وجهة نظر ما أقصد ضلاله ولا غي = ولا لي بغير ارضاك مطلب ولا أدوار
النحاس إلى شب اللهب به يصدي = وإلا الذهب تزيده النار بإنوار
يا من هوى قلبي ومن يعجبه هي = عقل وعفاف وبالبهاء بهر الأنظار
حبك شربته شربة الهيم للمي = متمكنٍ من دم قلبي والأفكار
القد غصن البان هاف بذرا فيء = يسقا زلال ومعتنٍ فيه بذّار
والردف شال الثوب طيٍ على طي = والخد واللبه كما ألوان الأزهار
شكلك يقول اقطع علاقاتكم بي = لا شفت ما للحب بنيتك مقدار
ودي أصير أبعد من أبـها عن دبي = ولا بيننا أي اتصالات وأخبار
ولا شفت طرفك يبتسم قال لي عي = ودي أصير بلبتك رتبة إزرار
لا تتركيني دون هذي ولاذي = قربك ادواي وبعدك لصحتي ضار


 صميم التآصل
أرجوك خلك مستمر بتواصلك = ترى حياتـي مع دوام التواصل
بالك يردك قل وصلك وحاصلك = وما ياصلك منـي من الوصل واصل
وا هم قلبـي من مقاطع فواصلك = كلما اندمـجت ارتعت من شوف فاصل
ليتك تصارحنـي بـمشكل تنصلك = ساعة أبيك ومقبس الوصل ناصل
ما دام أنا ما أقدر أشوفك ولا آصلك = يكفينـي اسـمع صوت نغمتك ياصل
وكانك تشبهنـي بقوة تـحملك = تراك تعاملنـي بتحصيل حاصل
سبحان من أبدع جمالك وفصلك = بالوجه وأطراف البدن والمفاصل
عمقت حبك في تعمق تآصلك = لما وشـمتـي به صميم التآصل



 بعيبي وطيبي 
متى يـجنـي منك يا ورد الأطياف = بآخر خبر وش صار لك في مغيبـي
عساه ما يـمزع معاليق ميلاف = قلبٍ لهزات الخبر يستجيبـي
تراي ما أذكر غير فضلك لرجاف = يا داي هو ودواي وأنتـي طبيبـي
باللي مضى ما ذيره منك هتاف = لكن لظى الغيره يحطم لبيبـي
أقسمت ما أمشي خطوةٍ غير بسعاف = وتراك ما لك فايده بتعذيبـي
كان أنت لا هاجر ولا عندك اخلاف = قدر لدمٍ مـمتزج مع سريبـي
لقيتنـي متجاوبٍ معك شفاف = حكم ضميرك لا تعبّث بغيبـي
لا يطمعنك في سيات الأصداف = تسوقنـي للناس سوق الجليبـي
إلى ذكرتك كن بالقلب نتاف = من شوقي لروياك لأنك حبيبـي
وحيثك تـميز في بعض زين الأوصاف = أقول ليتك لأجلها من نصيبـي
وأنا سعيدٍ للتوافق بالأعراف = مع من يشاركنـي بعيبـي وطيبـي


 نهج القداما
ظهرت وغبت يا عيوني القطامي = وأنا من بعدك اعيوني سقاما
قبل ما يتم لنا عرف الأسامي = ويا بعد الفرق لو معهم تساما
وأنا أدورك من زامٍ لزامي = وراه خبوت وجبالٍ تزاما
شناخيب الحجر والشوك أمامي = عليها أدوس وأقدامي تداما
فلا تطمع وتبخل باحترامي = إلى جت لك مراكيبـي تواما
ما أقول اني عظامي أو عصامي = أنا بدوي ولي ربعٍ تحاما
ولو اهنت النفس لما ينقص مقامي = لا يمكن تكون لي برد وسلاما
أنا العادات والمبدا نظامي = تبع ربعٍ على نـهج القداما
وأنا معهم وهم ستري حزامي = وعلى الواجب مداغيشٍ نشاما


 سيرة أجدادي
يا بنت أنا ماشيٍ سيدي = ما أميل مع بعض الأسيادي
عيدي بقولي نظر عيدي = ترى كلامي ما هو عادي
أنا بدوي في مناقيدي = ماشيٍ على سيرة أجدادي
لا يـمكن أترك تقاليدي = وأمشي تقاليد الألحادي
أن جاز لك مذهبـي حيدي = وزيلي عناي وتوجادي
متى انتظر منك تقليدي = ما أنتي بوادي وأنا بوادي
ويوم يتفق رأينا عيدي = وأقدّم البن والكادي
والزل وأشعل مواقيدي = وأعدني بأجمل أعيادي
وأن كان ما شفت تاييدي = عن أرضك عليت منطادي
ولا يـمكن ترجع مناطيدي = لو دوّرت عبر الأرصادي
يصعب على الرصد تحديدي = وعرف انحداري ومسنادي
من بعد ما ألغي مواعيدي = وأقفّل الباب بحدادي
أبعد ولا أرضى بتجريدي = ما أرضى مباديّ تنكادي
ما أقبل على الشين تعويدي = ما دام هذا هو البادي
إن كان ما قلت يا عيدي = قولي أنتي يا حظي الرادي
ما أعمي لكم عيني بييدي = أموت ما أدخل لكم نادي
وش خانة كثرة تجاعيدي = من كثرة همّك على فوادي
ومن حيرتي اميدك وميدي = مدري أينا الدال والغادي
أوسف بصيدي وتصديدي = ماني مع الناس متقادي
عرضتني للمناقيدي = يسولف بها كل هربادي
بلا مبرر لتنقيدي = المقتدي ما يبي قادي


  بيتٍ مذرّا 
يا مرحبا باللي لفو عندنا حشام = من شأن واحد لو مجيه مجرّا
يعل من جراه يسلم ولا يضام = لو كان ما شفته ولكن مدرّا
هلا هلا بك يا بعد كل الأنام = يا من هجرنـي دون ذنب و تـجرّا
البيت بيتك وأهل البيت خدّام = تقدر تصرّف به على ما تورّا
تأمر وتنها وكل ما تطلبه تام = ومن ما رضي قله على طول برّا
وإن ما اقنعك تنـزل مقاصير و اخيام = في وسط عيني حول بيتٍ مذرّا
يا أبو ثليل أسود على متـنه أردام = بالكريـم والعطر الزبادي مطرّا
والجيد يشدى جيد تلعات الأريام = والخد يـجهر لو نظرته تـمرّا
والعود ريانٍ على خير ما يرام = لا هي نشاش العود ولا هي بسرّا
يا صاحبـي كم راح عامٍ وراء عام = أفرح بشوفك وأنت عنـي تذرّا
ما تدري أن جيتك شيءٍ لنا هام = وأهم شيءٍ في حياتـي يـمرا
تقل ما عندك عن معاناتـي إلمام = وأنا هيامي منك هلم جرا
على معاملتـي تواخذ وتـنلام = ليتك مثل حالي تحب وتـحرّا
غزيـتـنـي غزو التحالف لصدام = يوم فر هو وجـموع بعثه مسرا
اللي معادٍ له رفع بيض الأعلام = واللي معه خلاّه غصب وتبرّا
هذا وأنا ما اغزي ولا أزرع ألغام = واحسب احساب المقبله واتدرّا
انصف معي لو يوم من كل الأيام = لا تـخلي الأعداء عليه تزرّا
لا تصير لي يا سيّد الحب ظلاّم = وأنا معك في كل سرا وضرا
 

أرجوك 
اللام لو القلب بالحب غلاك = والطا طبع به طبعة السطر بالبوك
وباقي الرموز اقولها كان زرناك = لا قيل:"فيه" أقول لك كان نادوك-1
ما ادري من اللي بعاطفة قلبي انباك = من أقرب طريق مداهمه صار مملوك
ما كنت أقربك ولا آبه بذكراك = حتى لقيتك تملك القلب بصكوك
ولا كنت اظن أحد يتهقوا سواياك = تسطي على سدٍ تخليه مفتوك
واللي حدوني ومنعوني وأنا ابغاك = من غير حقٍ خيبوني واهانوك
عسا يعجعج بأرضهم عج دكاك = زلازلٍ منها الصفا يطير مدكوك
وتعصف عليها صرصرٍ عجها صاك = لما يتحجر فوقها الرمل مسموك
من قادرٍ ما يقاومه علم وأملاك = لا محكمه لا طب لا أمن ولا أملوك
و إن كان ما رأيي يوافق مع أرياك = أسف عليك من القهر لا تولوك
يا ورد ما احد مقدرٍ لك مزاياك = قرر مصيرك قبل تزرع مع الشوك
عساك ترحم معجبٍ بك توراك = من غيركم يصيبه أوهام وشكوك
يحن لك في كل حين يترجاك = ما دام ما جاه الخبر عنك مشبوك
يا سعد من وقته سراميد وياك = بالعون ما يشبع معك هاتي ودوك
سعادتي وسعادتك بيدك وأرضاك = في كلمتين أو كلمةٍ منّك أرجوك
قولي أيه أبيه وما طلبتي فداياك = قربك معي يسوا ملايين ولكوك
الحاشية
1- - لا قيل: " فيه ": أي إذا قيل: " فيه "، بمعنى بقية اسمكِ مكونة من لفظة (فيه) التي يفظونها الناس عادةً، وذلك أن اسمها (لطيفة) 0  ففي البيت الأول ذكر الـ (ل)، والـ (ط)، والباقي (فيه) مبعثرة أي غير مرتبة على ترتيبها في الاسم 0   

لاخير فيمن لا أدب له 
لي صاحبٍ ما ارتاح دونه إلى غاب = ياليت من يحصل على ملك حبله
قلت له أنا أحبك ولا استحمل اغياب = وأنتي تقل ما لك بما اشوف شبله
وأنا عليك أخاف من حسد الأصحاب = يا ما وثق شخصٍ بشخص ونصب له
وأنا إلى شفت الدلع خاطري طاب = وأحب من يمشي على ما يجب له
قالت اظروف وكل شيءٍ له أسباب = ولابد من المكتوب للي كتب له
وإن كان حنا بالهوى نحسب احساب = أن ما حسبنا حسابكم من نحسب له
قلبي بحبك ما تغيّر ولا أرتاب = ومثلك لمثلي يفهم اللي نسب له
وكانك غيور ويزعلك هرجٍ ايجاب = وش هالشقا في حبنا والتعب له
قلت التجارب شيبتني وأنا شاب = اشوف امورٍ تودع العاقل أبله
وإلا أنا رهن الاشاره لمن طاب = رفيقك الطيب إلى طاب طب له
واقطع مواصل من قطع حد الأداب = واقول له لا خير فيمن لا أدب له


مرضي الناس كايد 
هذي مداهل صاحبي تونا صغار = اخلي مافيها من أهلها شرايد
يا ما من حيٍ حل ومن موقفٍ صار = لا الناس ناس اليوم ولا الوقت عايد
نوبٍ بعيد ونوب ينزل لنا جار = وحبه يتزايد بالرخاء والشدايد
يا دار ما كنا نزلناك يادار = جميع شيءٍ عقبنا فيك بايد
ولاتقل بك قابلت خلي وأنا مار = بصدفة زمانٍ ما تجي بالوعايد
حين قلت أبطيت ومحترٍ كم زوار = يجي أهلي وتكثر عليّ النشايد
والناس تبحث عن هدف كل مسيار = وأحيان يقال مخالفٍ للعوايد
قالت ما دامك ما تجي كل الأمرار = وعلى ما قالو "مرضي الناس كايد"
أجلس تقهو "وخشم عمّار للنار" = نموت وحنا للخواطر انصايد
قلت ياشذا عطرٍ عبق عند عطار = يا ألذ مذاقٍ ما احتوته الموايد
عينٍ تملك ملها سقم مسمار = من صبيها يدخل وراء ما يحايد
للناس غايات وقوانين وأنظار = ومتخالفينٍ بالعقل والعقايد
وسد الذرايع ما علينا منه عار = لأجل ما يكثر قول ناقص وزايد
وأهل اللوازم ما تقنعهم الأعذار = واللي يحرفون الحقايق بدايد
به عالمٍ تسعا وراء نشر الأسرار = تقول تنشرها وكالة جرايد


 وطلٍ يطله





المواضيع المتشابهه
عنوان الموضوع الكاتب الردود الزوار آخر رد
الفصل الثالث: المساجلات نافل علي الحربي
1 906 نافل علي الحربي
الفصل الأول: الشعراء وأشعارهم نافل علي الحربي
8 4436 نافل علي الحربي
الفصل الثالث: مختارت من أبيات المجموعة الظريفة نافل علي الحربي
0 1486 نافل علي الحربي
الفصل الخامس: مختارات من محتويات الديوان نافل علي الحربي
0 1137 نافل علي الحربي
الفصل الثاني: الألغاز نافل علي الحربي
1 1398 نافل علي الحربي

الكلمات الدلالية
الفصل ، الرابع: ، الغزل ،


 











الساعة الآن 08:38 صباحا