آخر المشاركات



أهلا وسهلا بك زائرنا الكريم في ديوان الشاعر نافل علي الحربي، لكي تتمكن من المشاركة ومشاهدة جميع أقسام المنتدى وكافة الميزات ، يجب عليك إنشاء حساب جديد بالتسجيل بالضغط هنا أو تسجيل الدخول اضغط هنا إذا كنت عضواً .


الملاحظات




26-08-2019 02:43 صباحا
مشاهدة مشاركة منفردة [2]
نافل علي الحربي
menu_open عضوية موثقة
rating
معلومات الكاتب ▼
تاريخ الإنضمام : 27-07-2019
رقم العضوية : 2
المشاركات : 343
الجنس : ذكر
الدعوات : 1
يتابعهم : 0
يتابعونه : 1
قوة السمعة : 10
موقعي : زيارة موقعي
 offline 

11- تلقا به عيوب *
 
وله هذه القصيدة، يخاطب فيها الشاعر هادي البسيس الحربي: 
هات القلم يا اديب وادن المناديب = واكتب حماك الله من كل عذروب
أبيات عندي سالمات العذاريب = حيث الجواب الزين والعقل مرغوب
حضّر اهجوسك وأنتبه لي وأنا أجيب = وأطلب وتاجد والطلب منك مكتوب
الشاعر اللي ماضي له تجاريب = بالعرف والمعروف ما عاش مغلوب
أبو حسين مصعّب القاف تصعيب = له ماقفٍ بأول زمالاه محسوب 1
هادي عدو مشذبين العراقيب = اللي مجالسهم على عيب وذنوب
غبر الوجيه اللي بعيده عن الطيب = أقشر بشر بالحي وملقّط اذهوب 2
ذواهب مع سامر الليل تـهريب = ما يندرا من وين ومن أين مجلوب
ضيف اللعين ابليس ما ادري معازيب =  مهما يبي منهم يوديه مندوب
أهدافهم بأعراض الأجواد تخريب = وأعمالهم دايـم على غير ماجوب
أوادمٍ ما يفهمون المواجيب = أكل وشراب ونوم ولسان شاذوب
واظنهم لو حاولو حقة الذيب = ما حصّلو منها ولا ربع مطلوب
بس الرداء منهم تبين بلا ريب = وأصبح عليهم ما ادّعو فيه مقلوب
هذه وصايفهم وأنا ما اعلم الغيب = عسا عليهم يوم الأوقاف مغضوب
واضف لهم بعض النفوس المغاضيب = لا قرّب الله دارهم لوهم احروب
انبيك عن ناسٍ جنوبٍ وتغريب = دايـم عليهم بيرق الخوف منصوب
يعوزهم مخافة الله وتأديب = سلم العرب في صوب وهم عنه في صوب
وقتٍ به النـمّام والمخطي امصيب = واللي يشير بنية الخير مشذوب
ولا بقي ياكود طق المشاعيب = الله يعاونا على صبر ايوب
هذا حسب ما وافقن الهناديب = والماء يقولون الرياجيل مشروب 3
تـم الجواب وكان يحتاج تعقيب = عقّب عليه أخاف تلقا به اعيوب
واسلم فداك مكدرين المشاريب = واللي حياته كلها ما قضا النوب 4
الشاعر/ محمد الجويدي الحربي                       
الحاشية:
1- زمالاه : زملاءه0
2- اذهوب : ذهوب ، ومفردها ذاهبة ، وهو اسم يطلق على الحيوانات السائبة ، كالإبل التي تركت هملاً ليلاً ونهاراً ، ترعى بلا راعي ، وغيرها 0 ملقّط : مجموع حصل عليه بلا تعب ، إما أنْ يعثر عليه من غير قصد ، وإما أن يؤخذ من أماكن متفرقة ، وهو ليس من أصلٍ واحد ، وربما كان مهملاً لعدم صلاحه ، والاستفادة منه 0
ويقصد بها الشاعر هنا بعض الفئات الوضيعة ، التي تفد عناصرها إلى بعضها بعضاً،فتنشأ بينها علاقات ، لاخير فيها 0
3- الرياجيل : الرجال 0
4- النوب : الواجب ، أي العمل الذي يلزم الشخص القيام به بمفرده ، أما أن ينوب عن غيره بغياب ، أو أن يقوم به كلٌّ منهم على التعاقب ، والمناوبة ، سواءً كان متكرراً عمل هذا الواجب ، أم أنه حدث مرة واحدة ، وقام به كلٌّ من الأشخاص ، بعد قيام الآخر به ، وهوكالنوبة ، يقال : " جاءت نوبتك " أي حان الوقت الذي تعمل فيه نيابة عن غيرك 0

تلقاه مقضوب 
       
 وله رداً على قصيدة الشاعر محمد الجويدي " تلقا به اعيوب ": 
سر يا قلم ودوّن سلامٍ وترحيب = مثل العسل بدر المباكير في كوب
أبيات ناقيها عن الشك والعيب = عن قولة القايل عذاريب ونقوب
للشاعر اللي يرمي أهداف ويصيب = تحيا بقيفانه أحساسيس وأقلوب
أبو احمود اللي من الصغر للشيب = اعدل من الميزان واحلا من الذوب
حرٍ مطاليعه بروس المراقيب = وسكر على الرديان بيبان ودروب
وجه لي أبياته معاني وترتيب = من راس ما وجّه بالأبيات مندوب
وأنا عرفت من الرموز المجاذيب = وعندي خبر بعلوم يوسف ويعقوب
اللي يبي  للغافلين العواقيب = لابد ما يقلب على راسه الشوب
بالوقت هذا ما تفيد الأطابيب = والناس حط إبليس بقلوبـها ثقوب
المال لو انك تـمده من الجيب = ما ينفع المعروف يا عم بالطوب
بعض الأوادم تطلع الشمس وتغيب = جمعه خساره كاسبٍ الإثم مكسوب
المال لو انك تـمده من الجيب = ما ينفع المعروف يا عم بالطوب
بعض الأوادم تطلع الشمس وتغيب = جمعه خساره كاسبٍ الإثم مكسوب
لا يهم راسك ناشرين الأكاذيب = على شوارب شاربه ينشب الروب
الجيل الأيـمن للمراجل طواليب = والجيل الأيسر همه الزاد والثوب
من لا تعرّب ما تفيد التعاريب = ومن لا صـمد يعطي له الوقت عرقوب
ومن حط راسه تحت صقع المصاليب = تبي تشوفه بآخر الوقت مصلوب
لولا أن قدامه سيوفٍ محاديب = ما قام يدبي بالقفا تقل دبدوب
الله يعز مثبتين المراكيب = مظللين نجد عن كل لاهوب
واللي يتصور في دماغه دواليب = إن لف وإلاّ دار تلقاه مقضوب
للخير فعّاله وللشر تعذيب = مَنْ ناش حد الله له الحبل مكروب
إن شفت يـمنا مسيلمه ناشت البيب = طلّع اذباب السيف للنذل ويتوب
الزول بيّن والوسم للأجانيب = مكواه بالمعلاق والضو مشبوب
من لا فهم وأخذ بالأيام تدريب = ما عاش متعلم ولو كان موهوب
الشاعر/ هادي البسيس الحربي
        19/5/1414هـ ​

 
12- بينك وبيني 
  
وله مخاطباً الشاعر هادي البسيس الحربي: 
البارحه ماني من النوم ممنون = ما ادري علام النوم عيا يجينـي
وأنا بخير ولا تعلمت مفتون = والله هو  ربي والإسلام دينـي
الناس قالو ينفعون ويضرون = والنافع الله والعدو اللعينـي 1
وأبديت ما كنيت وابليس ملعون = أبيات ما تخفا على الطيبينـي
شد المعاني ما بـها ما يقولون = منها سليمين الشرف سالمينـي
يأخذ بـها المشتاق لذات وفنون = وأبعد مدا عن غرة الغافلينـي
عبّرتـها بالعرف والعزم والهون = مع الطريق المستقيم اليمينـي
يـم الأديب معبّر القاف مازون = هادي وسيع العرف ما هو دوينـي
بأهل زمان اليوم وافي ومأمون = وأنا أتشرف بالشريف الأمينـي
اسند عليه بكل ما كان مكنون = دوسٍ على خد العدو البطينـي
للي يبيع الدم من غير قانون = شِبْه السليم وداخل الروح صينـي 2
أجرب ضمير مهوّجرٍ له ومرسون = يبي يـموت وذيخ جدلاء حزينـي 3
واللاش قالو لو تغسل بصابون = على الرداء مثل الحديد الشبينـي
هو ما درى انه تايه الرأي مديون = لله وخلق الله والوالدينـي
حسبي عليه اللي عبيده يصلون = خوفٍ رجاهم بأرحم الراحمينـي
يا ابو حسين اشرح لك الوضع وش لون = ودي يصير الرأي بينك وبينـي
وقاف الزغيبي بأول الوقت مضمون = يقول ما يعرض على العارفينـي
تـم الجواب وصاحب السوء ممهون = والذيب ما يأكل عشاه الحصينـي
واسلم فداك مقاول الحكي بادون = وإن جاء لزومٍ لازمٍ ما يبينـي 4
وصلاة ربي عد ما كوّن الكون = على نبيه سيّد المرسلينـي
الشاعر/ محمد الجويدي الحربي                       
الحاشية:
* انظر رد هادي البسيس الحربي " باللوازم تبيني " ص 152 0
1- العدو اللعين : أي العدو أبليس 0
2- يبيع الدم : يقطع الرحم 0 صيني : أجرب 0
3- مهوّجراً له : على التشبيه بالجمل الذي هوجر له ، أي ربطت يده اليمنى برجله اليسرى ، بينما يسمّى الجمل  الذي ربطت يده اليمنى برجله اليسرى مهجور 0 والمقصود أنه لا يخالف رأي صاحبة بيته 0
4- بادون : بدون 0

 باللوازم تبيني  
   
                                                وله رداً على قصيدة الشاعر محمد الجويدي " بينك وبيني ":                                                     جاني من الشاعر بيوتٍ لها لون = يجلا الصدأ حلو الكلام الثمينـي 
يا طيب الرفقه ترى العمر مرهون = وأنت الذي وقت اللوازم تبينـي 1
مواقف محمد بها الناس يدرون = كسّاب للطوله مع الغانمينـي
يا أبو احمود اليا ومرت أمر ما أخون = خذني على اليمنا يا أسد العرينـي 2
واللي علينا يا الجويدي يغلطون = من قالو إنّا للخطأ صابرينـي
والناس بعد الله تراهم يكفون = بالأرض للدنيا من الشاهدينـي
والناس من وجه المزيف يعرفون = لو رهّم الضحكه من الشاربينـي
بعض البشر صورة رجل زول واعيون = لا من هل الدنيا ولا المسلمينـي
القلب طبل وباقي الجسم جالون = لا موديٍ حاجه ولا جاب شينـي 
حنا نـمد الناس باللي يـمدون = وبالله عزايـمنا تقض المتينـي
صدقاننا دايـم على ما يحبون = وعدواننا منا من الخاسرينـي
اللي يبون محاربتنا يضيعون = يهفون مهَف معايد القريتينـي
وتـم الجواب امتممٍ شرح والحون = واسمح سلمت ويسلم السامعينـي 3
وصلو على المختار يا اللي تصلون = ما هل وسمي السحاب الغشينـي
الشاعر/ هادي البسيس الحربي
الحاشية:
1- تبيني : تبين ، بمعنى تظهر ، والياء للضرورة الشعرية 0
2- ومرت : أمرت 0
3- الحون : لَحُون أو ألحان ، ومعناها أوزان شعر تتفق في صيغتها وإيقاعات انغامها 0


13- بين الحسد والنميمه *
   
وله يسند إلى الشاعر هادي بن سعود البسيس أيضاً: 
دنّت هواجيس المعاني قلمها = على طواريق السلوم القديـمه
من عيهلٍ ماءها تحدا اقيمها = بدأ الجواب بكل جد وعزيـمه
أبيات من يبني بها ما هدمها = مع الأسف بعض المباني هديـمه
عرفت عنها في محافل اقممها = على ما قالو طخةٍ بتعليمه
منها تعاليمٍ يرفرف علمها = آمنت بالله غارةٍ في هزيـمه
جوله مع الشعّار تأخذ سهمها = عسا لها ما بين الأجواد قيمه
عاشت يـمين الكاتب اللي رسمها = من خاطرٍ طيّب ويـمنىٍ هميمه
عسا الأديب المعتبر يستلمها = ويمضي عليها كان صارت حكيمه
هادي سعود اللي هجوسه هممها = بغض المشاكل والطروق الوهيمه
لحيث رجله ما تخطا قدمها = مع الطريق اللي على غير شيمه
ونفسه عن الزلات ربه عصمها = والعلم الأيـمن يفعله ما يضيمه
سلّم عليه وجابتي يحترمها = جابة وفاء من كل عيبٍ سليمه
واللي حما نفسه وهو ما ظلمها = ما هو على درب الخطأ والظليمه
والناس ما هو من جهدها كرمها = من كرم الله لليدين الكريمه
والحاجه اللي ربنا ما قسمها = مهما نحاولها تراها عديـمه 
الشاعر/ محمد الجويدي الحربي                

والقلوب الغشيمه *

                                 وله رداً على قصيدة الشاعر محمد الجويدي " بين الحسد والنميمه ":                                     يعيش من قال الحروف ونضمها = مثل الزهر في روضةٍ عقب غيمه
هبت ذعاذيع الشمال بنسمها = والمسك جاء من ناقلينه نسيمه
دارت بتفكير الحكيم وحكمها = حلو المعاني والبيوت العظيمه
يسوقها بالمعرفه ما يغنمها = يسبق على نظم القوافي خصيمه
محمد حمود الطيبه يغتنمها = ياقف بها قدم الرجال الفهيمه 
من الرجال اللي تقف في لزمها = عن اللوازم ما يذب الخريـمه
حاش المراجل والرذايل هزمها = عز الرفيق وسم كبد لخصيمه
اشتقت لبيوت الحكيم ونغمها = ووقعت  لمحمد عسا الله يديـمه
ثارت براكين الضمير بحممها = وغدا لها بين المحاني حطيمه
توافدت يوم الجويدي زهـمها = أمواج بحر الشعر تسمع لطيمه
اليا استوا لي دربـها ما كتمها = قلبي واجاوب للقلوب السليمه
وإن كان ما غطا شحمها لحمها = ما أمد بارودي لصيد الهليمه 1 
العلم واسع والعرب في شيمها = عادات سلفها مع خلفها مقيمه
أشر بـها الشاعر وقلبي رقمها = شفت وسمع من ضايع الفكر ضيمه 2
دورٍ لهد روس الرجال ووسمها = يبكي منه طارق وتضحك حليمه 3
ناسٍ ثعالبها تفرق جزمها = عمي البصاير والقلوب الغشيمه 4
لو إن سرّاق الخزون يغرمها = واللي يهدم ساس المروءه يقيمه
ثوّر على روس الأعادي لغمها = ومن شذ منهم حوّلوه بجحيمه
هدت شياطين البلاد وخدمها = وجيش النفاق أخفق وكفّن زعيمه 5
عقاربٍ يقرص ذنبها وفمها = وإن شفتها عند اللوازم مسيمه 6
الناس تخطي كان ما الله رحمها = ذنب الخطأ ولا عذاب الجريـمه
ما تذكر يومٍ فيه تدفن ارممها = في مظلمٍ دب الدهر به مقيمه
وختامها بأزكا الصلاه وتـممها = على النبي ما يـمطر المزن ديـمه
الشاعر/ هادي البسيس الحربي
الحاشية:
* انظر قصيدة محمد الجويدي  " بين الحسد والنميمه " ص 104 0
1 بارودي : بندقيتي ، التي استخدمها في الصيد 0 الهليمة : المهزولة 0
2- رقمها : فهمها خلسةً ، وبسرعة 0
3-  لهد : أثقل ، وضغط 0 طارق : قائد عربي ، أصله من أفريقيا ، فتح الأندلس ، بأمر مولاه موسى بن نصير ، أمير أفريقيا ، وتوغل في أوربا ، وأسبانيا ، وعاد مع موسى إلى سوريا ، فدخل دمشق في موكبٍ حافلٍ بالاسرى ، والغنائم ، في عهد الوليد بن عبد الملك ، سنة 96هـ ، توفي سنة 102هـ 0 وأصبح مضرب مثلٍ للرجولة ، والبطولة 0حليمة : أسم امرأة كان لها عادةٌ سيئة تركتها ، ثم عادت إليها ، فقالوا :  " عادتْ حليمة إلى عادتها القديمة " ، فأصبح هذا القول مثلاً ، يُضرب في كلِّ مَن يرجع إلى عادةٍ سيئةٍ تركها 0  
4- جزمها : جمع جزمة ، ويقصد به الجزم على الأمر ، أي المضي فيه ، والعزم عليه ، بلاعودة 0
5- هدت : هدأتْ ، أي سكنت 0
6- مسيمة : جمع مسيم ، أي خاضع يتحمل الإهانة والمشقة ذلاً 0


 


تم تحرير المشاركة بواسطة :نافل علي الحربي
بتاريخ:26-08-2019 02:26 مساء








الساعة الآن 10:39 صباحا