آخر المشاركات



أهلا وسهلا بك زائرنا الكريم في ديوان الشاعر نافل علي الحربي، لكي تتمكن من المشاركة ومشاهدة جميع أقسام المنتدى وكافة الميزات ، يجب عليك إنشاء حساب جديد بالتسجيل بالضغط هنا أو تسجيل الدخول اضغط هنا إذا كنت عضواً .


الملاحظات




26-08-2019 02:03 صباحا
مشاهدة مشاركة منفردة [1]
نافل علي الحربي
menu_open عضوية موثقة
rating
معلومات الكاتب ▼
تاريخ الإنضمام : 27-07-2019
رقم العضوية : 2
المشاركات : 343
الجنس : ذكر
الدعوات : 1
يتابعهم : 0
يتابعونه : 1
قوة السمعة : 10
موقعي : زيارة موقعي
 offline 


8- بالمظامي عمارات  
          
    (( محمد الجويدي )) 
وله مسنداً إلى حوّاس الديري الحربي: 
قال الذي يبني جوابٍ على صاد = متعلمٍ ما علمه كثر الأصوات
إلاّ إلى جاه صوت من بعض الأمجاد = ارفع لهم بحجاج عيني درجات
وأنا ما أحب اللي يحبون الأنكاد = ولا أعاتب المرضا ولاني ببهات
أخاف ربي واحترم سيد الأسياد = ربٍ تعالا فوق سبع السموات
هو الكريـم اللي بجوده لنا جاد = مده ولا مد اليدين البخيلات
وأنا عرفت وشفت وأدري بعبّاد = وأخالف أمره وأبتعد عنه بسكات
وإن نالني معروف ما اكون حجّاد = اسمح واسامح وانتبه للرسالات
خذ الكلام اللي تكلّم به استاد = أحلا من الشكر على در خلفات
يا مرحبا باللي على روس الأشهاد = أرسل جوابه بالبيوت العفيفات
وأحيا ضميرٍ عن هل السوء بحياد = لا ماشيٍ معهم ولا عندهم بات
هذا المراد وكل شخصٍ له مراد = ولا بد ما قالو هذاك الرجل مات
والعلم الأيـمن له مبادي وقياد = وعلى بعض ناسٍ دروبه صعيبات
عاش الأديب المحترم حيث ما أراد = يا مرحبا به من اهجوسٍ كريـمات
حوّاس ابن غازي صدوقٍ بالأوعاد = له التحيه والشرف والمساوات
أبدي له الواجب ولو كاد ما كاد = وأنا معه مهما تكون الكلافات
وأشرح له الموضوع أطلب له إسعاد = من دولة المغرب لحد الأمارات
حيثه شباب وعن بعض سنته زاد = والطيب أخير من الرداء عشر مرات
واللي ذكر موجود في بر وابلاد = ناسٍ يبيعون الحساني بسيات
ألومهم وأدعي عليهم بالإبعاد = يعل ماهم حولنا بالقرابات
سود الوجيه اللي على الشر نواد = تلقا مجالسهم على ودّه وهات
حسبي عليهم فاختو سَلْم الأجواد = واسترحلو هرج القفا والمناوات 
أقول يا فاطن ترى بعض الأفراد =  يبنون في روس المظامي عمارات 
خذ ما صلح منهم وخالف هل الواد = والناس تدري بالمنازل حشرات
وأنا ما أعم الناس والعلم ورّاد = ألوم ناسٍ يكشفون الخفيات
وأقبل تحياتي بلا نقص واحداد = واسمح حماك الله من كل الآفات
وآخر عدد ما عمّد الصبح وانقاد = على النبي مني سلام وصلوات
الشاعر/ محمد الجويدي الحربي                       
الحاشية:
(1)- ودّه وهات: أي أن أحدهم ينقل من المجلس كلاماً بطريق النمامة، ويأتي بمثله 0 
(2)- المناوات: المناوأة، أي المفاخرة، والمعارضة، أوالمعاداة 0
(3)- روس المظامي: رؤوس المظامئ، أي أبعد أماكن العطش، ومظامئ مفردها مَظْمَأ، أي مكان الظمأ، وهو المكان الذي لا ماء فيه، والذي تقضي فيه الرعية مدة ظمئ، والظمئ: هو مدة ما بين الشربتين، أي فترة غياب الرعية بعيداً في طلب الرعي، في فصل الصيف 0
وتختلف أسماء الأظمأ من اختلاف مددها، فمن أظمأ الغنم ما يسمّى عُرَيْجاء، وسمّي بهذا الاسم من تسمية الكلّ باسم البعض، وذلك لأن الغنم ترد فيه كلّ عريجاء، أي كلّ منتصف نهار في القيظ، حين شدّة الحر 0 وطمئ غِب، والغِب: الشرب يوماً بعد يوم 0 والرِبْع: وهو الشرب يوماً بعد يومين 0
ما ظمئ الإبل، فهو خِمس فما فوق الخمس، وهو البقاء ثلاثة أياماً دون شرب، لأنها لا تشرب إلاّ باليوم الخامس، إذا عد يوم الصدر زائد ثلاثة أيام في المظمأ، زائد يوم الورد، الذي ترد الإبل فيه، ولا تصل الماء إلاّ وقت المساء ، فتشرب، وتبات، وعند الصباح تعلّ، أي تزوّد من الشرب، ثم تصدِّر، ويقال: " خمرتْ الإبل " أي وردت مساءاً، وباتت على الماء، فهي خامر جمع جمير 0
ويقصد الشاعر هنا من بناء العمارات في أبعد الأماكن عن الماء والناس، الكناية عن الكذب والافتراء، والكلام البعيد عن الحقيقة 0


مروجين الاشاعات 
                                                                                                    
وله مسنداً إلى الشاعر/محمد الجويدي الحربي:
بديت بسم اللي له الخلق سجاد = المطلع بالبينه والخفيات
اللي بسط سبعٍ وجعل لها أوتاد = وسبعٍ رفعها بلا عمد محي الأموات
ومن بعد ذا بديت ببيوت اجداد = ولمحمد ابن حمود وجهت الأبيات
حيث الجويدي في معانيهن استاد = وله عادةٍ بالفوز ياخذ علامات
حكيم له عسرات الأبيات تنقاد = لو كان عسراتٍ يجن له مطيعات
وأنا أفتخر به كان هرج العرب زاد = في وقتنا الحاضر وفي فايتٍ فات
 يعطي الخبر أن صار للعلم نشاد = شاعر وله في ما قف العز وقفات
 يا الشاعر المعروف وان جاء به اعناد = مواقفك عند الجميع امعروفات
 والطيب والناموس لك فيه مسناد = لا جاء مجال أهل الشرف والجمالات
ارسلت لك معناي من غير ميعاد = أبيك تعطينـي احلول امصيبات
اشوف ناسٍ دايـم اسيوفها احداد = بـهرج القفا لها مغازي وهدات
ولـهم على حش العراقيب ميعاد = الله لا يثري ثراء كل شمات
يضحك لك بسنه وهو خافقه صاد = وتلقا عليه من المنافق علامات
أشوف أبو وجهين له ربع وأنداد = على الرداء جاء له ربوع وعصابات 1
ويشن غاراته على ناسٍ أجواد = يضحك وهو يرميك بالنار بسكات
ومن عاش بالحيلات بالغدر ما فاد = ولا عاش من هو عايشٍ بالحيالات
والحر الأشقر عقب ما كان صياد = اليوم عقب الصيد يبغا السلامات
 البوم صايد وأشقر الريش منصاد = يشوف في وقته من الضيم عينات
كثر الحسد هو والتباغض والأحقاد = والغدر له عينه بـهالوقت بالذات 2
أشوف هرج الصدق ما عاد ينراد = بعض العرب يحب هرج الدعايات
ويوم أنت بالمعنى فهيمٍ ونقّاد = وش رأيكم بـمروجين الإشاعات
اللي لهم بالكذب مصدر وميراد = ولا عندهم للي يقولونه إثبات
وإلى سكتنا عن حكي كل ثرّاد = الحيه الرقطاء تلد عشر حيات
ودي نكافح خارب الطبع باجهاد = ونحط له على حبينه علامات
وان كان خلا الطبع الأول ولا عاد = جعله مهف مقيط من غير رجعات
واقبل تحياتي بلا حصر واعداد = واسلم عساك امجار عن كل الآفات
وصلاة ربي عد ما حن رعّاد = على نبيٍ حارب أهل الضلالات
الشاعر/ حوّاس الديري الحربي

الحاشية:
? انظر رد محمد الجويدي  " بالمظامي عمارات " ص 96 0
أنداد: جمع ند، بمعنى: مثيل 0

9- شرواه خاسي *
    (( محمد الجويدي )) 
وله مشجعاً لعددٍ من شعراء مدينته، ومنهم سعود الوصّي، وهادي البسيس، وحوّاس الديري، ومشاركاً وحاثاً لهؤلاء الشعراء، على التصدي لما يفرضه أصحاب النفوس الضعيفة، والمبادئ الهدامة، من عادات سيئة، مخلّة بالآداب، والأعراف:
البارحه عندي طواري وهوجاس = توافقن متخالفات الجناسي
وأصبحت منهن ضايع الفكر منحاس = واصغيت للماضي وأنا قبل ناسي
من طلعة البيضاء إلى وقت الادماس = وأنا اتفكر وش سبايب اعماسي
ما ادري خطأ مني لقف لي عقب ياس = وأنا أحسب أني بعض الأيام قاسي 
وإلاّ عرض لي واحدٍ شبه بلاس = يبي يسوي بالطريق التماسي
وأخذت من ضو الرجاجيل مقياس = أبي أشترك معهم ولا فيه باسي
اسعود ابن محسن وهادي وحوّاس = أعدهم مثل الجبال الرواسي 
ما دامهم في ماكر العز جلاّس = أنا أبا اقول أن الشرف ما يداسي
للمجتمع منهم معزه ونوماس = وارجال بالمرصاد ضد المآسي
وإن تاه مع سوق الطمع بايع الباس = خلّوه ياقف بالطريق امتواسي
أعزهم وأرفع شرفهم على الراس = وابليس باللعنه وشرواه خاسي
نبي نقول فلان تدري به الناس = يأخذ نصيبه في حياته تعاسي
خلّه يبيع ويشتري بوق وافلاس = والناس تدري بالذهب والنحاسي
هذا هواه اللي مسميه لحّاس = عليه من لوم الجماعه مكاسي
جعله مهف مقيط وادهام دوّاس = وقريح والمبعد خوي الدماسي
والظاهر أن الدار عيبه من الساس = الخط واضح والمعلم اسياسي
خذ الجواب اللي بمعناه حساس = وما جاك من الطقات خلّه براسي
الشاعر/ محمد الجويدي الحربي
 
بين الحفيفين قاسي *
مجراة الشاعر/ سعود الوصي لقصيدة الشاعر/ محمد الجويدي السابقة:
بديت بذكر اللي خلق كل الأجناس = اللي بسط أرضٍ ورسّى مراسي
اللي خلق ناسٍ بعد ناس من ناس = ناس تروح ويطلع الكون ناسي
جبت القلم والحبر واحضرت قرطاس = احضرت له فكري وحضرة إحساسي
وفتلت ابيوتٍ مثل ما يفتل امراس = اطلع على العلياء واكب الخفاسي
جتني بيوتٍ مذْرَبه مثل الأمواس = حاده وحدتني ابيوتٍ قواسي
من الشاعر اللي للصعيبات مدباس = مدباس ظلماء بالليالي المساسي
الشاعر اللي بالقسا مثل جساس = لا صار ما بين الحفيفين قاسي 1
أبو حمود ببحر الأشعار غطاس = أديب بالمعنى حكيمٍ مواسي
يوم المنافق حد موسه والأضراس = عليه صبيت الرصاص السلاسي
اللي عمل بين الأجاويد لولاس = كذّاب نمّام خبيثٍ اخلاسي
بعض الرجال ايقال له نذل واهلاس = اللي على الغايب يحد الضراسي
كم واحدٍ من سبته يوجس اوجاس = يضحك احجاجه مار قلبه نجاسي
والناس فيها اجناس من قبل ابن واس = إلى وقت نوح ودور برسيس ياسي
هذا وأنا ماني على الناس دبّاس = ولاني على الغايب بلوسٍ ادباسي
اسكت واجامل واترك الهرج لا باس = إلاّ إلى فرّ الهبود الملاسي
أطق حنكانه مثل طقة الكاس = بيدين ورعٍ طق كاسٍ بكاسي
الشاعر/ سعود الوصّي الحربي

الحاشية: 
1- جساس : هو جساس بن مرّة ، قاتل كليب بن ربيعة ، أخ الشاعر الشجاع المعروف المهلهل ، والذي بسبب قتله لكليب ، دارت حرب البسوس ، مدة 40 سنة ، بين قبيلة بكر وأختها قبيلة تغلب ، والبسوس : ناقة لجارة لجساس قتلها كليب 0 الحفيفان :  مثنى الحَفّ ، هو المعنيّ بالأمر ، المهتمّ به 0


على الطيب راسي *
 
 وللشاعر هادي مساجلةً مع قصيدةٍ للشاعر محمد الجويدي الحربي السابقة:         
البارحه جاني جوابٍ كما الماس = قافٍ سمعته من جواهر وماسي
وأخذت لي مع بحر الأفكار مرواس = وقدت السفينه بالبحر للمراسي
وقاف الجويدي صار له رد وإحساس = شغله شغلني لين ثوّر إحساسي
يا أبو حمود إن كان للعدل قيّاس = وقفتك مع عز الشرف ما تقاسي
وحنا معك لا صار للحبل مسّاس = إن جاء بعميان الضمير انتكاسي
راس العيا نقسم له الراس بالفاس = ونعطيه شربة سم ضد الغساسي
ويشرب عياه من الأواليد بالكاس = ومن الكحيله نجدعه بالمداسي
واللي حديده بين قصدير وانحاس = لازم يصديّ لو ترب النحاسي
عوج العصي ما تنعدل عقب الايباس = عودٍ عصا مع عوجته واليباسي
أشوف ناسٍ مثل دقات الأجراس = تلعي على غير السنع بالحساسي
وجندي ابليس اللي على الناس جساس = الله يغش أهل القلوب الغشاشي
بعض العرب يهرف تقل فيه وسواس = يجيب من هذا لذاك الدساسي
ومن بالوشايه يبرد الحزن والياس = يقضي حياته بالوزاء والمآسي 1
واللي يـموح أخطاه مع لين الأطعاس = لا بد ما ياطا الحسك والهراسي
وسلمت يا أبو حمود للعدل نبراس = نعم الرفيق اللي على الطيب راسي 2 
 الشاعر/ هادي البسيس الحربي
الحاشية:
1- المآسي : جمع المأساة ، وهي الفاجعة ، وكلّ حادثة تحمل على الحزن 0
2- النبراس : السراج 0
                      

10- ورقم البطاقه *     
    (( محمد الجويدي )) 
وله مخاطباً سعود الوصّي الحربي: 
دنت هواجيسي وغنيت مشتاق = تشريف والتشريف باب الصداقه
حيث الجواب الزين من بين الأصداق = زرع المحبه والوفاء والعلاقه
بالعرف والمعروف واسباب الأرزاق = دايـم لعصمان الشوارب علاقه
والرزق عند اللي للأرواح خلاّق = وهايبٍ ما هي نـهايب اسباقه 
وأنا ما أحب اللي بالأعراض دقاق = موس القفا وامراية الوجه عاقه
ولاني لغرات الأجاويد سرّاق = وأهاجم اللي يشتغل بالسراقه
ابيع واشري بالمعاني وتنساق = واسوقها تـمشي بليا حماقه
يـم الرفيق اللي تفوّق بالأخلاق = والعلم الأيـمن والسخا واللباقه
يا ابو طلال ادعي لك بطيب الأوفاق = وأنت الذي ياسعود حماي ساقه
من حيث ما وجهت للعلم سباق = وإلى بغيت اقول مرضي رفاقه 
على وفاك أعطيك عهدٍ وميثاق = والختم وإبـهامي ورقم البطاقه
واللي يقول أخطيت بالفين طقاق = خلّه يروح ولا يهمك فراقه
من طاح خلّه يا فتى الجود ينعاق = هذا هواه اللي تخيّر وباقه
اختر رفيقٍ للمواجيب عشّاق = مثل البليهي فوق حمله وساقه
إلى عطاك الرأي تلقاه صدّاق = وإلى اعترض طاريك عزه وشاقه
وإلى حصل توفيق مع طيب الأعماق = الماء القراح ولذته عقب فاقه
خذ الجواب اللي على بيض الأوراق = هديةٍ مني وتبقا العلاقه
وأقبل حماك الله من كل تفاق = اهل النـمايـم والعلوم الدقاقه
وصلاة ربي عد ما لاح برّاق = وعداد ما هب الهواء باصطفاقه
على نبيٍ لا تغير ولا باق = صلو عليه وصممو للتحاقه
الشاعر/ محمد الجويدي الحربي       


 زاد احتراقه 
   
وللشاعر/ سعود الوصي، يساجل قصيدة الشاعر محمد الجويدي الحربي السابق:    
يا ابو حمود لخطك اليوم مشتاق = ساعة لفاني خاطري في طلاقه
يا مرحبا مليون وعداده أطباق = من خاطرٍ له بأحسن القيل طاقه
العلم له مغزا ومصدر ومزراق = وأنته لنا درعٍ تضارس احلاقه
لعل ما تقصر يمينك وتنعاق = إلى بنيت البيت تكمل ارواقه
يصير له ظل وعن البرد مشراق = ولأهل النظر يمتاز بأحسن لياقه
وسهمك يا فرز الوغاء يكسر الساق = سوءٍ على رعا الرها والنـزاقه
الهرج والله محرقٍ قلبي احراق = صبرت لين القلب زاد احتراقه
ناسٍ على العالم تشدّق تشداق = يرهمون الهرج ماله علاقه
طيبهم اللي كل ما خاطره ضاق = بعروض خلق الله غدا له نقاقه
عن لازمه دايـم يتملق تملاق = تقصر عن دروب الرياجيل ساقه
يا عل بطن أم الكباير لشقاق = ليه الضراوي ما تمرر مذاقه
تجزاه عن عرض الاجاويد بطراق = خطو الهبود اللي خبيثٍ نطاقه
ولا ألوم من جنّب طواريق همّاق = اللي على اللازم قويٍ وثاقه
حلاّل للصعبات مبهم ومغلاق = فتّال حلاّلٍ قويٍ عَمَاقه
وصلاة ربي عد مالاح برّاق = على النبي اللي عظيمه اخلاقه
الشاعر/ سعود الوصّي الحربي




11- تقفاه مسباق 
  
وله هذه القصيدة، يخاطب فيها الشاعر هادي البسيس الحربي: 
دنّت هواجيسي وبينت ما اخفيت = وأخذت لي مع منهج الربع دوراق
وش عاد لو كثرت علي التصاويت = مهما تكون الحال ما خاطري ضاق
إن جاء المسيّر يـمنا قلت حييت = عداد ما تـهب الهبايب بالاشراق
قال السلام وقلت له نوّر البيت = واللي تـمر من المباني والأسواق
نبي اليا تـم السلام وتقهويت = اشرح لك المعنا على جنح خفّاق
أقول يا هادي تكلّمت وأشفيت = والناس تدري بينهم بعد وافراق 
ناسٍ على الذمة وناسٍ شحاتيت = والمشتبه من بينهم شبه زرّاق
والشرع ما يرضا بحكم الطواغيت = يرضيه من خلّف اسماعيل واسحاق 
أنا ما أقول انك قصرت وتعديت = خذني على يـمناك بسلاح فتّاق
وأنا إلى مني رضيت وتساويت = وحضر اللزوم وعوّدت لأم حقّاق
دبوس ياقع فوق روس العفاريت = حجّام قلاّعٍ للأضراس حلاّق
أما أنت يا ابو حسين كويت وابريت = رجلٍ شريف وفي معانيك عملاق
لا تحسب اني عن لزومك تخليت = أيام لي ما طاب نومي ولا راق
كدّر علي الجو بعض السرابيت = اللي مجالسهم إلى كاس ترياق
أهل الشوارع والعبث والزغاريت = أكالة المخفي مع الورك والساق
بين الطعوس وبين بعض الحوانيت = عسا مهف اللي تقفاه مسباق
وإن ما تعدّل صفهم فيه كبريت = حامي لهب يقضي عليهم بالاحراق
هذا الجواب اللي حسب ما توريت = وأنت المعزب عدني معك ملحاق 1
وأبي السموحه كان قصّرت واخطيت = بعض المواقف ما تجي لي بالأوفاق
الشاعر/ محمد الجويدي الحربي                       

الحاشية
1- عدني معك ملحاق : عدني : اعتبرني 0 معك : بالنسبة لك 0 الملحاق : شخص يرافق راعي الإبل ، مهمته مساعدة الراعي ، وإلحاق ما تأخّر من الإبل ، ويكون عادة أصغر سناً من الراعي 0 ويقصد الشاعر إنه  يقول للمخاطب عن بعض الأمور ، وهو ليس أدرى أو أحرى منه بها 0 



بألف طقّاق
    
 وله رداً على قصيدة الشاعر محمد الجويدي " تقفاه مسباق ":      
البارحه في وادي الشعر طبيت = بأمرٍ من الباري لتحريك الأشواق
طبيت في بحر المعاني وغنيت = وأخذت من سوق التـماثيل ما لاق
والقاف اعبر به على ما توريت = وأسوق قافي للمعاني وينساق
كتبت قافي للجويدي ورديت = لأبو حمود معلم الجيل الأخلاق
حيثه فهيم والتـماثيل له صيت = للعرف والمعروف طالب وعشاق
وأنا أفتخر باللي يعزك إلى جيت = مثل الجويدي دام للطيب سبّاق
يا الله عساه بعز يا حامي البيت = جعله سعيدٍ لا مشاكل ولا إقلاق 1
هذا الصحيح اللي طلبت وتـمنيت = للطيّب اللي لا تجاهل ولا باق
وعن كل واجب طيبٍ ما تخليت = وانصا الرجال وكل طيّب له اشتاق
وإلى نصاني قمت معه وتقصيت = صادق واصادق كل رجّال صداق
وإلى نصحني له تسمّعت وأصغيت = كم ناصحٍ شوره فتح باب الأوفاق
واللي يحذّف في قفاي المشاخيت = اصبر ما دام الصبر يقدر وينطاق
وجّهت يـم الله ومن يـمّه أقفيت = الله يحاسب كل واشي ودقاق
أصد عن هذا ولا كنّي أوحيت = وأقول فيه إلى ذلف بألف طقّاق
لو اعرف اني لا بغيته تعليت = أبي الجزاء لا ألتفت الساق بالساق
عساه نقّال الحدج والحلاتيت = اللي انذبح من كسبةٍ له لها ذاق
الشاعر/ هادي البسيس الحربي

الحاشية:
1- جعله : بمعنى عساه 0 إقلاق : إزعاج 0

 


تم تحرير المشاركة بواسطة :نافل علي الحربي
بتاريخ:26-08-2019 02:22 مساء








الساعة الآن 10:03 صباحا