ديوان الشاعر نافل علي الحربي
موضوع بعنوان :الباب الخامس: المساجلات الشعرية
الكاتب :نافل علي الحربي


بسم الله الرحمن الرحيم

الباب الخامس: المساجلات الشعرية
****
( باب المساجلات الشعرية من ديوان نافل علي الحربي الجزء الثاني )
مع بعض الشعراء
***
يشتمل هذا الموضوع على العديد من القصائد التي وجهها الشاعر نافل إلى أحد الشعراء، أو احدهم وجهها إلى نافل على سبيل المساجلة، أو على بعض القصائد التي 
لم تُقَل على سبيل المساجلة، ولكن بعض الشعراء جاراها بقصيدة أخرى او جاراها أكثر من شاعر بقصائدهم، سواء رُد على هذه القصائد أو لم يُرد عليها، وبغض 
النظر عن غرض كل من هذه القصائد 0
***... *** ... ***

ترى ما ندانيه
***
الأبيات الآتية للشاعر الأمير/ خالد بن سعود الكبير، قالها في صف علماء المملكة، وضد الحملة المغرضة التي تشن ضدهم في الخارج، وقد جاريتها بأبياتٍ ستأتي بعدها:
قالوا علامك قلت مدري علامي = شفت الخطأ واضح ولأني مخليه 
حبي لديني ساقني للكلامي = واللي يحب الدين لابد نفديه 
حنا عن التوحيد لازم نحامي = وننزه أهل العلم والشرع تنزيه
سلام مني للرجال الحشامي = من لا يدانيكم ترى ماندانيه
شعر الشاعر الأمير/ خالد بن سعود
*****
*****
وبالعرض تكسيه
***
الأبيات الآتية هي مجاراة مني لأبيات الشاعر الأمير/ خالد بن سعود الكبير السابقة:
وأنا أقول ان ما حملتني عظامي = من أجل أجاهد دون ديني وأهاليه 
ماني بنافل عند معنى الاسامي = ولا يعدني أخو النزاهه بناخيه
وقول الأمير أويده بانضمامي = للي على التوحيد تثبت مباديه
وراعي الضلاله لو طلع من عمامي = والله ما أرضا به ولأبقى معاديه
حتى يعود لطاعة الله تمامي = ويحكم الانصاف حتى بعوانيه
وبحر الطغام المغرضه دوم طامي = وطريقهم بين ولا أمشي مماشيه 
ومن وحد الله كلنا له نحامي = ورعى البغي والشرك تفشل مساعيه 
وهاذي تعابيري وبصمة ابهامي = وسلامةٍ طوله وبالعرض تكسيه
شعر/ نافل علي الحربي
*****
*****
ما به نزاهه وغيره 
***
الأخ عبيد الداموك، عندما صدر مؤلفي { تحفة المساجلات }، بحثت عنك في عدة أماكن منها مقر عملك، وغيره، فلم أعثر لك على الخبر، 
ولقد أسعدني انضمامك إلى هذا المنتدى، وبهذه المناسبة قلت الآن هذه الأبيات، التي أهديها إليك، وأرجو أن تجيبني عليها:
وينك وأنا أدورك لي عام يا عبيد = أسأل عليك بكل حروه وديره
أنا أحمد الله جت على كيف ما أريد = اسمك معانا يا نقي السريره
حياك ربي يا خويٍ له نريد = ونعم الخوي يا ابن الوجيه السفيره
ويفداك سودان الوجيه الملابيد = اللي بهم عن كلمة الطيب ذيره
مجردينٍ من النزيهات تجريد = حثال الرخوم أهل الفعول الشريره
أجهل عن الواجب من اللي على الديد = ما منهم اللي كان همه مصيره
يوم أن كلٍ له كتاب ومواريد = أما جنان الخلد وإلا سعيره
لهم بمجال الخوض سرد وهرابيد = وبالطيب واحدهم يخون تعبيره
الله لا يبقي للأنذال عربيد = في جاه من ما اختار به كل خيره
ويجيرنا من موجبات المناقيد = ويزيل من ما به نزاهه وغِيره 
شعر/ نافل علي الخميس 13 صفر 1431 
*****
*****
مثل فراش الليل
***
هذه القصيدة للشاعر/ معاند ( خالد البيضاني ) :
تجمعوا حولك ، يسار ويمينك = مثــل فراش الليل لا شافت تريك
هـذا وقف بين انتباهـك وبينك = وهــذاك باسم انك تحررت يغويك 
لقــوك في وقتٍ تغرك سنينك = لحظــة تفتــح وردك ، وغاب واليك
يمـلا ابتسام الطهر نظـــرات عينك = واحساسك المرهف يســيّـر خطاويك
لقــوك والجـــاني دلالـك و زينك = مظهرك يرفض كل ماض الطفل فيــك
يبــون ربط يدينهم في يدينك = و تـتـبع طريقٍ للندامة يوديك
يقــضون لذات معـك قبـل حيـنك = ويفارقــونك قبل تدرك هقاويك
إن طعــتهم غير إنهم ظالمينـك = ظلمــت حسنك و إكتمال الحلا فيك
شعر/ معاند ( خالد محمد البيضاني )
*****
*****
ولا تجد من يبريك
***
وجدت قصيدة الشاعر معاند السابقة، فأعجبتني مادة الموضوع، في هذه القصيدة التي في غاية الجودة، والتي تصور سعة اطلاع، 
وخصب فكر ناظمها، فكان ردي عليه بهذه الأبيات الآتية: 
يا صاحبه يا عناد ربك يعينك = وعلى تحمل ما تعاني يقويك
ويلم شملك مع حبيبك ضنينك = ويبرئ من الغيره تجدد مكاويك
إن كان دينه يتفق هو ودينك = قل له يخلف الله على اللي حواليك
ألعب بهم مثل الورق في يدينك = أخبص ووزعهم على فروع ناهيك
والزات منهم لا توليه عينك = يخسون ولا يسوون حتى مواطيك
بسبب جمالك كل عينٍ تدينك = بقتل الغرام ولا تجد من يبريك
هذا وأنا يا أخوك قد ذقت بينك = يا عناد ما جاني من الحب ما يجيك
شعر/ نافل علي الحربي
*****
*****
يا نافل علي أنت وينك
***
هذه القصيدة للشاعر/ خالد محمد البيضاني العمري الحربي ( معاند )، قالها رداً 
على قصيدتي السابقة، التي وجاريت بها قصيدته التي قبلها:
من امس يا نافل علي وانت وينك = انا من البارح اصوت واناديـك
القاف جاني كاتباته يـديـنك = و انته بشعرك تتعب اللي يجاريـك
يا قاف رد العـلم لمجوديـنك = واللي مقلطنا على اجزل معانيك
لا والله الا هي تفدى جبينك = قطعة كرستاله وصارت بلستيك
من لا يودك لا تصافح يمينك = وابعد عنه حتى ولو هو بناخيك 
شعر الشاعر/ معاند ( خالد البيضاني )
*****
*****
حكمه وتكتيك
***
ردي على قصيدة معاند ( خالد البيضاني ) السابقة:
يا عناد أنا حضرت حالٍ لعينك = ساعة سمعت القاف جيتك ملبيك
يا عناد حد الله بيني وبينك = لو ما تحكم الشعر ما أعجبت أنا فيك
شعرك جواهر صياغتها يمينك = تسلم يمينٍ بالأوائل تساويك
وأنا اعتبرني من ضمن معجبينك = وتستاهل اللي يعتني بك ويرويك
مثلك علم وتنومس مدونينك = بك من مزايا العرف حكمه وتكتيك 
شعر/ نافل علي الحربي
*****
*****
هيبة أصحاب السمو والمعالي
***
قصيدة للشاعر/ خالد محمد البيضاني، موجهها إليّ: 
يا سلامي على اللي له بقلبي معـزه = عملةٍ مـاتفرط لو تطول الليـالـي
من بيوت على الدين انبنت و المعـزه = حرب للحرب تاريخ من اول وتالـي
مسندي هو عضيدي يالجـناب المنزه = منزلك بالسماء بين النجوم العوالـي
يا علم فوق راس طويق أبيض نـرزه = هيبـتـك هيبة أصحاب السمو والمعالي 
شعر الشاعر/ خالد محمد البيضاني 
*****
*****
فزعتي للتوالي
***
ردي على قصيدة الشاعر/ خالد محمد البيضاني الحربي السابقة :
يا ابو محمد فوادي فز لك كم فزه = يوم جتني بيوتك خطها ضغط عالي
يا سلامي على بيوتٍ لها زود مزه = من أديبٍ معوّد للمعان الجزالي
جعل ربي يزيدك من نعيمه وعزه = خل قدري بقدره يوم جا له مجالي
كل قدرٍ يقدر في مكانه وحزه = يا كريم السجايا لا تزود جلالي
وأنت قدرك رفيعٍ وهضبته مقلحزه = يا ابن مجدٍ معرب بين جدٍ وخالي
يا عوض من لجا له يا ملاذه وبزه = يا رفيقي صديقي من يمين وشمالي
كان قلبي وجيع وكل همٍ يحزه = ويوم جاني كتابك سحت وارتاح بالي
جعل يفداك من هو له أهدافٍ توزه = لأجل اعلومٍ رديه ما لها أول وتالي
حط رمحه بكبدي عقب كزه وهزه = جابني في طريقه فزعتي للتوالي
شعر/ نافل علي الحربي
*****
*****
اسميه تاجي 
***
هذه القصيدة مساجلة مني شعر موجهها إلى الشاعر محمد العواد الحربي، وذلك لأنه سبق وأن قال لي: سأرسل إليك قصيدةً وجهتها إليك، 
ولكنها ليست لدي الآن لأنني لا أحفظها ، فلما تأخر وصول القصيده بعد ذكرها بعض الوقت، بعثت إليه هذه القصيده التي ضمنتها رأيي الشخصي حول ما أتمنى أن تكون القصائد اليوم من نوعه، هي القصائد الصالحه للتدوين، لا الأشعار التي لا تدون ولا تقال في كل مكان مثل قصائد الهجاء، خاصةً القصيده الأولى، التي تكون 
سبباً في التهاجي، والتي إذا قيلت ربما يقع بسببها إشكال لا تحمد عقباه، ولا تخدم القبائل بأي حالٍ من الأحوال، لأنه لا يوجد بين القبائل أي عداء، يبرر
التهاجيء بينها، قال عز من قائل: " افحكم الجاهلية يبغون ومن أحسن من الله حكماّ لقوم يُوقِنون "المائدة50 ، فالشعر الصالح هو ما كان خالاّ من االمآرب 
الشخصية الدنيوية الدنيئه، كطلب الشهرة على عاتق القبيلة، بل يخدم المصلحه العامه، ويعلي كلمة الله، وذلك إذا وعي الشاعر ماعليه من واجبات اتجاه دينه ومجتمعه، فاحترام أنظمة دولته، وخدمها بشعره مدحاّ كان شعره أو هجاء، في سبيل الدفاع عن الدين، والوطن والمواطنين، وتوحيد الصف والكلمة حول ولاة الأمور، قال تعالى:" ومن أحسن قولاً ممن دعا إلى الله وعمل صالحاً وقال إنني من المسلمين " . 
ولا أنسى إن أقول: إن الأخ الشاعر محمد العواد أرسل إلي القصيدة المطلوبة منه، وقصيدة أخرى رداّ على هذه القصيدة في نفس اليوم الذي وصلته فيه قصيدتي هذه، وقد رديت على القصيدة المطلوبة حين دلك، كما هو مبين لاحقاًّ: 

يا أبو عبد الله وين مذكورك الآن = البر خيره عاجله ما يجاجي 
أبي الهدف اللي أنت مسويه نيشان = بقولك أبا أرسل لك بيوتٍ سواجي 
ما أدري وش اللي يلبسنه من إعلان = عن السجايا الضيقه والفجاجي 
مقبولةٍ لو هي هجاءٍ لي بنقصان = أنا مع اللي ينكر الإعوجاجي 
وكشف الخطا وذم الرذايل بالإنسان = مشروع وذمامه لجزواه راجي 
لا صار لا يخص به فلانه ولا فلان = اصدور سمحين السجايا ملاجي 
تقبر بها الأسرار من ماض الأزمان = وليل الذي عينه على الناس داجي
وأنا عدو للرداء وين ما كان = ولاني مع اللي للقبايل يهاجي 
متميلحُ بعيوب ربعه دليقان = يقول يهاجيني بها كل هاجي 
يعيدها بكل الأماكن والأحيان = يقول يعيروني بذيك الرواجي 
ويشوف حاله من غروره بليهان = دجاجةٍ من مدحها قول ماجي 
لا هو من عيال الحمايل وله شان = وله سمعةٍ قشراءٍ عليها عجاجي 
يبغا يضيعها بتوزين الألحان = والمصمصه ماهي سوا والنفاجي 
يزعم إصلاح الغير وجواه خربان = ومن الحياء والصمت والميز ناجي 
ما في أهدافه ذرة عفه ولا إيمان = إلا الرياء والسفسطه والتهاجي
وأنت الرفيق اللي معي قلب ولسان = وأنت الوحيد اللي اسمه تاجي 
يوم اختفا نجمي ولا عقبها بان = عزيتني به لا فجعكم امفاجي 
يفداك من ينقر تحت كل دجان = وعنقه على الجارات فيه انعواجي 
الشاعر/ نافل علي الحربي
*****
*****
ما يوافق مزاجي 
***
رد الشاعر/ محمد العواد الجوبيعان، على قصيدتي ( اسميه تاجي ) السابقة:
حي الجواب وحي من صاغ الألحان = ترحيبةٍ يجهل مداها المجاجي 
جاني جوابك يا سلايل كحيلان = وقلنا هلا بكتاب طلق الحجاجي 
وأرسلت مطلوبك ولاني امنان = لو كان مدح الروح قالو سماجي 
والشعر يا نافل به اضعاف واسمان = وأنا ضعيفه ما يوافق مزاجي
وإن صار للشعار بالشعر ميدان = عن الجزيله ما ندور ملاجي 
والخط يعرف كان للخط عنوان = ويعطييك سعر السوق راع الحراجي 
وعن طولها يكفيك ماقال راكان = وقولٍ بلا معنا يجي به اخماجي
الشاعر/ محمد عبد الله العواد
*****
*****
صوت داعيها 
***
قصيدة مساجلة للشاعر/ محمد بن عبد الله العواد الجويعان الحربي، موجهها إلى الشاعر والمؤلف/ 
نافل علي القمامي الحربي13 / 1 / 1429 هـ:
البارحه ليلة الهاجس ما هي ليله = ليل الهواجيس يفرق عن لياليها
يا مل قلبٍ إليا هوجس يطريله = روابعٍ كنت أظن القلب ناسيها
إليا طراله من الماضي تفاصيله = راعيه يخلف قدم رجله مواطيها
من كثر ما شاف من وقته تهاويله = تخم نفسه طواريها وتخطيها 
إليا ذكر ماضي الوقت ومقابيله = يغيب مع حاضر أيامه وما فيها
لو أنت عنده تصوت له وتوميله = عنك المسامع مسكرةٍ مجاريها
وليا انتبه فاته المعنى وتحليله = تفوته السالفه ما تقل يوحيها
يا الله يا اللي خلقت الروح وتشيله =يا محصيٍ كل خلقك وأنت واليها 
تلطف بحالٍ سعا وقته بتذليله =عنه المصادر مقفيةٍ سوانيها
سواني الزرع تقفي عنه وتجيله =وسواني الحال خلت له مناحيها
ما له سوا يا عسا ربه يسويله = تومي به أيام وقته مع لياليها
عبر زمانٍ مضا دارت محاحيله = وعدّت على خير وضامنه تواليها
أبا أشكي الوضع وأرسل مع مراسيله = عسا الموزع رسالتنا يوديها
يا اللي تشيل الرساله شوف من هيله = وأسلم وسلّم لنا لا جيت راعيها
وإليا تقهويت من صافي فناجيله = وقال الخبر قل له ارساله ودوكيها
وإليا أخذ الخط نافل قبل يبديله = تفصيل ما بالرساله من معانيها
ودع محله ترا الإنسان تأتيله = روابعٍ تخلف أفكاره طواريها
إليا سمع صوت رجالٍ يناديله = خصٍ إليا قام يزهم صوت داعيها
أبا انتظر رد نافل مع محاصيله = عساه يذكر دروب الخير نمشيها
وختامها العود مع بنٍ كثر هيله = مع التحيه لابو نواف نهديها 
الشاعر/ محمد عبد الله العواد
*****
*****
قبل داعيها 
***
قصيدة مساجلة وهي رد نافل علي الحربي، على مساجلة الشاعر/ محمد العواد الجويعان الحربي " صوت داعيها " السابقة13 / 1 / 1429 هـ:
يا مرحبا بالبيوت وحي من هيله = ارسالة اللي نحب الله يحييها
عداد ما هل هطالٍ هماليله = وعداد حاصل النجوم بضرب داجيها
وأهلا وسهلا بـمندوبه ونثنيله = وجزيل شكري لحاملها ومنشيها
ولو انتظر لي دقايق كان أخاويله = لأجل أتشفا من الشكوا بتقصيها 
لكن عسا الله يرعاه بتساهيله = ما أعطا الرساله قبل يمشي لقاريها 
حياة من لا فزع للربع وش هيله = شلت يمينٍ ما تفزع قبل داعيها 
أما الدهر يا أبو عبد الله نرا ميله = ونحس مثلك بضداته ونوحيها 
ما من أحدٍ ما توطنه غرابيله = وراعي التجارب تفيده عن خوافيها 
يا معاتب الوقت عوجه ما بها حيله = جميع مخلوق بالدنيا يعانيها 
والعمر عشبٍ إلى أزهر كلٍ يخيله = يرجيه يكبر وتدله به رواعيها
وإلى استوا تطرب الناظر قناديله = أزهاره اللي تشوّق من يراعيها
وكلٍ انتفع به وكلٍ وده يجيله = وكثرو أهل النفع في مخصب مراعيها
وإلى يبس قل نفعه ودمره سيله = وأخلت حدود المداهل بعد أهاليها 
وأبشر بتحصيل ما يرضيك تحصيله = من الآن قدّم طلباتك وأبا أقضيها
الشاعر/ نافل علي الحربي
*****
*****
معاناة طغواك
***
الله يعين القلب يا المستبده = قلبٍ تعذب من معاناة طغواك
بقربك وبعدك غيرته مستجده = في كل لحظه مستجدات ذكراك
كن مستقيم ولا يجي فيك رِده = على سبيل الحق حسّن نواياك
لا يصير في جوك تكدر وجده = صريح حين وتخفي أحيان قصياك
لا اقبلت بحين أحيان بقفاي صده = وأنا على هالحال ماني بوياك
للصبر حدود ولا تعديه حده = عده حدوده وافقده من تحداك
واللي صديق ومخلصٍ بالموده = إن طبت طاب ولا تحديت شرواك
وإلى زعمتي تستبيحين سدّه = ما أبعد حدوده عن مفاهيم مبداك
لا توصلك هده ولا طول مدّه = ودربه مخاطر لأهل الغي وأهلاك
أخلص بعطاه الود ويعطيك وده = ومع قبسة العجلان تاصل لمغزاك
لا اتيه مع حلمه وصبره وجده = تكذبك ظنونك مع متاهات هاذاك
شعر/ نافل علي
*****
*****
خطك بيمناك 
***
بيتان للشاعر / هابس العلوي قالهما مجاراة لقصيدتي " معاناة طغواك " السابقة: 
الحق يا نافل ضروري نعده = نوادر الاشعار خطك بيمـناك 
والحــسـد والباطل نوقًف بضده = عسى المنايا يالبناخي تعـداك
الشاعر/ هابس العلوي
*****
*****
ولفظك ومعناك 
***
هذه الأبيات الآتية، قلتها رداً على البيتين السابقين اللذين عارضني بهما الأخ الشاعر هابس العلوي:
عداد ما بين الجزاير وجده = أهلاً وسهلاً يا أخي هابس وحياك
وحي الذي مثلك بعرفه وجده = يجمل رفيقه بالحصافه والادراك
والسالفه وجهة نظر مستمده = من وحي ملتنا على قدر الأفلاك
غير النصح والحق ماني بِبِدّه = وأنت العلوم الطيبه من سجاياك
تعرف هوى المعنى وتعرف مرده = إسداء النصايح لا تنوّع هو هناك
واسلم سلمت وهات إذا فيك شَدَه = تراي ما أكره بالقصايد مجاراك
شعرك جزيل وفيه للفهم سده = ويجوز لي نظمك ولفظك ومعناك
الشاعر/ نافل علي الحربي 
*****
*****
بالمرجله لاعدمناك 
***
رد الشاعر/ هابس العلوي، على الأبيات السابقة التي وجهتها إليه رداً على بيتي شعر المجاراة اللذين عارضني بهما، والذين هما قبل القصيدة السابقة: 
الله علـى اللـي ما وقف بالمـكده = لكزس يقطٌعك الفيافـي لمسراك 
بيدين قرمٍ مـا اهتوى للمخده = بالمــــرجله واقوى المــلازيم كفاك
ساعه وساعه سهلةٍ مـجرهده = القاعده يمناه مـن تحت الأسلاك 
يم الحفر نارد ونشرب بعده = نافل علي بالمــــرجله لاعدمناك
اوصل لي المكتوب وايضا ترده = ياساعيٍ بالخير هذي هــداياك
مــــن يد هابس يم نافــل بيده = لا يطًلُع بالخط هـذا ولا ذاك 
البيت واضح بالوزن مـــن مشده = متكتكٍ بالقافيه خوش تكتاك
وقله قريحتنا غلا مسـتعده = واسـلم وسـلم عد مـا سارت اخطاك
الشاعر/ هابس العلوي 
*****
*****
من طيب ساسك ومرباك 
***
هذه القصيدة الآتية قلتها رداً على قصيدة الشاعر/ هابس العلوي السابقة:
حي الكتاب وحي من قال وده = وحييت يا مرسول قرمٍ به أوصاك
يا مرحبا بمرسول رجلٍ نوده = حياك يا المندوب ربي وبيّاك
ترحيبةٍ ما هي مواجه وجده = من خاطرٍ صافي وواثق ما هو شاك
وخطٍ حملته دوك بالحال رده = للي عطاك الخط وده وقل هاك
وإلى خذيته موتر الخير قده = يمة مغيب الشمس لا هنت ممشاك
إلى القصيم لهابس اليوم رده =عسى السلامه بالسفر تتبع اخطاك 
وعطه الجواب مناوله دون صده = وجهاً لوجه مباشره من محياك
وإن كان ما يعجبك موترك هده= وخذ لك جديدٍ من وكالة كديلاك
ما خاب ظني فيك شده وقده = على البديهي ارتجالي ولا اعياك
تسلم أفكارٍ تحسن اتقان عده = شعرك درر مثل الجواهر وأنا أفداك
من عيلمٍ ما أحدٍ يسد بمسده = استاذ القصيد اللي إلى ابدع به ارضاك
شعرك خطير وبه صلافه وشده = واللي يشوفك من قريب يتهاداك
تبقا وفال اللي يعاديك غده = يا طيبٍ من طيب ساسك ومرباك
الشاعر/ نافل علي الحربي
*****
*****
ومن قدم المعروف يجزى بمثيله 
***
الأبيات الآتية للشاعر هابس العلوي، قالها بمناسبة عودته إلى منتدى قومه، منتدى قبة، الذي هو أحد أعضائه، بعد غيابه عنه فترة معينة، ثم عاد إليه، وجعل أول مشاركةٍ له بعد عودته هذه القصيدة، التي تتسم بسمات الوصف والحكمة، التي أهم ما في مفادها أن المرء لا يجد مقام نفسه وقيامها وقوامها إلا حين يكون مقيماً بين قومه وذويه، الذين هم أصله وفصله، والذين يشكل معهم جزءاً لا يتجزأ من النسب الكل، هنالك يعلم أن المرء بنسبه وحسبه لا بذهبه، ذلك النسب المتمايزاً أسرياً، المتضامن اجتماعياً، السائد على خارطة الوجود حيزاً جغرافياً معروفاً له حدوده وأبعاده، وهذا هو نص قصيدة الشاعر هابس العلوي بالحرف الواحد: 
المحترم يفرض علينا احترامه = ومن قدم المعروف يجزى بمثيله 
وكلٍ منادى باسـم ابوه وعمامه = والرجل يفخر بالأهل والقـبيله 
وقولة نعم تبقى وسـام وعلامه = ينالهــا الرجال ناتج حصيله 
والكل بالاعضا رفيعٍ مـــقامــه = عرفة وفاء بين العميل وعـميله 
والمنتدى الشامخ عرف بالتحامه = موروث طبعه من ليالٍ طويله
ويا أحبابنا عدنا لكــم بالسـلامه = ونقيت من جزل المعان الجزيله
الشاعر/ هابس العلوي 
*****
*****
أخو المكارم والمزايا النبيلـه 
***
فلما نزلت هذه القصيدة بمنتدى قبة باسم شاعرها هابس واطلعت عليها، أعجبتني، فجعلت مروري لها قصيدةً رداً عليها، فقلت الأبيات الآتية:
حييت يا عضوٍ رفيـعٍ مقامـه = أخو المكارم والمزايا النبيلـه 
مطلوبنا يحضر ويبقى دوامـه = من بيننا في كل يـومٍ وليلـه 
والحمد لله بعودتك بالسلامـه = عقب فقدناكـم ليـالٍ طويلـه 
لابتك بموفور القدر والكرامـه = تستقبلك يا ابن كرام الفصيلـه 
وعسى جديدك يرسم الابتسامه = يثير إعجاب متابعين الفضيلـه 
كعادتك حول الشيم والشهامه = ما تكتب إلا النادره والجزيلـه
الشاعر/ نافل علي الحربي
*****
*****
بلا حدود وقياس
***
هذه الأبيات ترحيبية قلتها بمناسبة انضمام الشاعر المعروف نايف بن سلمان الغتر إلى هذا المنتدى اليوم، فهي موجهة إليه:
حييت يا ضيفٍ عزيزٍ علينا = نايف ولد سلمان والغتر له ساس
لنا الشرف ينضم مثلك إلينا = وجود مثلك مكسبٍ فيه نوماس
حنا على حب الجماعه ربينا = ونشفق على اللي قربهم يرفع الراس
وش زينها لا انضم معنا حدينا = يا خال نرحب بك بلا حدود وقياس 
شعر/ نافل علي القمامي الاثنين 5 /8/ 1430 هـ 
*****
*****
ما دخل فيه وسواس 
***
فيك البقاء يا من عشانه لفينا = من قلب صادق ما دخل فيه وسواس
صافي00ولو تطلب اكبارن عطينا = تبشر بها لو دونها قطع الارماس
الشاعر/ نايف بن سلمان الغتر
*****
*****
ويفهم العلم معكوس
***
هذه القصيدة للشاعر/ نايف بن سلمان الغتر، ولي بعدها قصيدة مساجلة لها: 
رادار فــكـــري يــــــا بــوتــركــي تــغــيــر = والبرمـجـة فيـهـا دخــل نــوع فـيـروس
سـبــب خـلــل وانـــا احسـبـنـه مـسـيــر = يمسي ولا يصبح به السـم مدسـوس
لرجـلـن هقـيـت الطـيـب فـيــه وتـخـيـر = عـن هقـوتـي دربــن يخلـيـه مـديـوس
مــن موقـفـن شـفـتـه بعـيـنـي مـضـيـر = علـى فعولـن دونهـا تقطـع الــروؤس
مـتـمــاديــن فــيــهـــا وفــيــهـــا يــعــيـــر = مـن رافقـه لـوهـو نظيـفـن ومـحـروس
لابــــد مــــا يـخـطــي طـريـقــن امـقـيــر = ويمسك طريقن فيه رقـلات وطعـوس
هــــذا قــــراري فــيـــه واحـــــذر تـحــيــر = الوضـع مـا يحتـاج دارس ومــدروس
عـطـنــي نـصـيـحـة وانـتـبــه لا تــذيــر = الضرس يقلـع لا بـدا بداخلـه سـوس
والــعــلــم لــلــعــراف واضــــــح ونـــيــــر = أسهل على ما قيل من سنة الموس
وإلا الـغـبـي جـاهــل وعـقـلــه صـغـيــر = تعطيـه عـلـم ويفـهـم العـلـم معـكـوس
هــــذا ولأنــــي مــــن مــداهــم قـصـيــر = ابدي المشورة خوفتي شرهت نفوس
عــلــى رفـيـقــن فـزعـتــه لــــي تـســيــر = دالــوب سـيـرن فـيـه رمــان وتــروس
شعر/ نايف الغتر
*****
*****
ويفداك هدروس
***
وهذه هي المساجلة التي ساجلت بها قصيدة " ويفهم العلم معكوس " السابقة، للشاعر/ نايف الغتر:
قـيـلـك يـــا أبـــو سـلـمـان شـيــكٍ مـجـيـر = لأمـر الذي يـبـي كلامٍ ولا فلوس
يـا نــيـرٍ مـا يـشـبـهـه كـل نـيـر = عـلـم شـعـر شـعـره مـهـذب ومـدروس
لـقــيـت فـي نـظــمـك دلـيـل لـتـخـيـر = وخصـب خيالـك قابلتـنـي لــه اعـسـوس
أمـا الـرفـيـق الـلـي بـغـيت وتـذيـر = مثل القريص اللي مع القرص ملموس
رعى الرداء مـا يـنـتـواسا بـخــيـر = ما لك وما له دام هو صاحب انجـوس
ودك هــــو وشـكله ضـحايا الـمـقـيـر = علـى السريـع بغفـلـة الـنـاس مـدعـوس
كنه على شين الطبايع مضير = أو ان سحره لشين الأطباع مدسوس
شعر/ نافل القمامي
*****
*****

يتبع